Os nacionalistas destacan que este novo sistema suporía un método que crearía emprego ademais de que incide na redución, reutilización e reciclaxe do lixo.

O BNG de Ribadumia presentará no pleno, unha moción que propón un modelo de superación do actual tratamento que se dá ao lixo polos concellos acollidos a SOGAMA. Nesta moción reclamase o apoio á tramitación de lei para a aplicar os principios de redución, reutilización e reciclaxe nos residuos de Galiza. Para isto, o BNG propón que o concello solicite que a Xunta destine os fondos previstos para novas incineradoras ao financiamento de proxectos comarcais de reciclaxe e compostaxe, que permitan a creación de emprego nas diferentes localidades e alcanzar os obxectivos de recollida selectiva e reciclaxe das sociedades avanzadas.

Ademais, o BNG pretende que se tome o acordo de solicitar á Xunta de Galiza o financiamento prioritario para as actuacións de mellora da recollida selectiva, incluíndo alí onde sexa axeitada a recollida porta a porta, e das actuacións de prevención a través da educación ambiental e a implantación da compostaxe doméstica e comunitaria. Tamén propoñemos que parte do orzamento municipal para implantar programas de educación ambiental para a redución de residuos e xestionar os residuos orgánicos mediante a compostaxe caseira e comunitaria.

O BNG tamén presenta outra moción na que solicita a derrogación do sistema de taxas xudiciais que aprobou o Ministerio de Xustiza e preguntará neste pleno pola relación laboral da concelleria do PP grovense Laura Besada co concello de Ribadumia.