Transcorridos tres meses do accidente dun camión cargado de aceite de oliva na cuneta da estrada que une Catoira con Caldas, e cuxas augas van ao regato das Cachopeiras que desemboca no río Catoira, os efectos seguen a ser ben patentes, como se apreza nas fotografías tomadas o domingo 11 de marzo.  

O BNG quere denunciar a pasividade das administracións competentes neste tema, e que semella menosprezar a importancia deste tipo de verteduras. Se ben son menos contaminantes do que sería no caso de aceites minerais ou derivados do petróleo, non poden considerarse inocuas en absoluto, podendo afectar á calidade das augas e á vida acuática.

Dende o BNG de Catoira reclámase:

• Que a Consellería de Medio Ambiente (e o seu organismo Augas de Galicia en particular) realicen a análise e avaliación da zona afectada por esta vertedura.
• Que ditos departamentos estuden a posibilidade de reclamar danos e prexuízos á empresa de transporte e/ou á súa aseguradora, nomeadamente a posta en marcha de accións de mellora e corrección, de seren precisas.
• Que o Concello de Catoira exerza a súa capacidade de xestión e reclamación neste tema, exixindo e velando polo cumprimento destas accións.