Prado e a Xunta Directiva de Persoal do Hospital do Salnés coinciden na necesidade dunha partida específica para a ampliación do hospital.

A deputada do BNG, Montse Prado reuniuse esta mañá cunha representación da Xunta Directiva de Persoal do Hospital do Salnés para analizar a falta de partida económica para as obras de ampliación do hospital nos Orzamentos da Xunta de Galiza do 2015.

Na xuntanza mantida coincidiuse no escepticimo a respecto de que haxa vontade por parte da Xunta de Galiza de facer realidade a ampliación, ampliación que desde o BNG, como os veciños e veciñas da comarca e a Xunta Directiva de Persoal leva anos demandando para unha mellora na calidade dos servizos e atención dos usuarios e usuarias.

Unha vez máis o Partido Popular e a Xunta de Galiza demostran a falta dun compromiso claro con dita ampliación, non entendendo que logo de meses co proceso de licitación as obras a día de hoxe non estén adxudicadas.

Tanto o BNG como a Xunta Directiva de Persoal do Hospital do Salnés valoraron que é necesaria e imprescindíbel esta ampliación e coinciden na necesidade de que nos Orzamentos do 2015 vaia unha partida específica.

O BNG lamenta que o Partido Popular confirmara e falara no Parlamento, a través da Directora Xeral da Consellaría de Sanidade, xa de prazos no 2016 e 2017, verificando con isto, que durante todos estes anos estiveron mentindo a toda cidadanía da comarca. Montse Prado pregunta onde está o compromiso do Sr. Feijoó no debate do Estado da Nación e das declaracións da Conselleira Mosquera que hai dous días reiteraba que nos orzamentos do 2015 si se contemplaba unha partida.

Desde o BNG trasladamos a nosa preocupación de que non haxa partida algunha para o 2015, preocupación compartida pola Xunta de Persoal do Hospital do Salnés e seguiremos traballando, facendo contactos e todo tipo de actuacións para que a Xunta de Galiza contemple nos orzamentos unha partida específica para o 2015.