A deputada do BNG, Montse Prado acusa á Xunta de Galiza de manter “un comportamento suicida” coa comarca do Salnés con  máis de 15.000 persoas desempregadas 

Santiago de Compostela, 21 de febreiro, 2013. A portavoz de Pesca do BNG, Montse Prado formulou hoxe unha pregunta ao Goberno  sobre o destino para as instalacións da empresa Alfageme  adxudicada á Xunta de Galiza  previstos en Ribadumia e Vilaxoán xunto coa marca Miau  e a previsión da súa cesión a un terceiro para garantir a súa viabilidade.

No transcurso do debate da  pregunta, Montse Prado amosou    a súa estrañeza por ser incluída esta iniciativa  na Comisión de pesca cando lle correspondería formar parte da orde da comisión de Industria o que produciu un rifirrafe inusual ao responder como membro do goberno, por sentirse aludido o hoxe mesmo elixido  presidente da comisión, Javier Guerra,  ex-conselleiro de Industria na pasada lexislatura  en troques do director do Igape,  Javier Aguilera encargado de responder á deputada do BNG.

Superado o malentendido e trala intervención de Aguilera, Prado reiterou que a comarca do Salnés vive “unha situación dramática” por soportar máis de 15.000 persoas sen emprego, situación á que a   Xunta responde, “cun comportamento suicida”.

Neste sentido, reprochou que a Xunta de Galiza prefira desentenderse  dos 30 millóns de euros para o proxecto en vez de loitar para conseguir a viabilidade de Alfageme e garantir os postos de traballo.

A Xunta, dixo, só pode presentar “unha unidade produtiva finiquitada, naves baleiras e máis desempregados/as e mentres tanto, engadiu, o director do Igape segue botando balóns fora e agardando que outros resolvan o problema de Alfageme”.

Montse Prado volveu reiterar o seu malestar ante a negativa do responsable do Igape a ofrecer información “actual e veraz” sobre as  xestións da Xunta de Galiza para reflotar o proxecto de Alfageme.